Liauw Tjay.
93
anak tjoetjoe, maka kendatinja Song Kim Long ada di dalem itoe geredja bertjampoeran dengan orang toekang minta-minta, aken tetapi Song Kim Long poenja adat ada laen sekali dari marika itoe, sebab Song Kim Long tiada brani djalan koeliling boeat pergi minta-minta, hingga ia tahan lapar sampe bebrapa hari lamanja, lantaran ia tahan lapar itoe maka ia poenja badan mendjadi koeroes dan ia merasa amat lemesnja.
Kemoedian pada soewatoe hari Song Kim Long poenja peroet terlaloe amat laparnja hingga ia tiada bisa tahan lagi, maka apa boleh boeat ia lantas kloear dari geredja Kho Bio itoe pergi di kampoeng boeat minta makan, serta ia baroe sampe di djalanan besar, terkoenjoeng-koenjong toeroen hoedjan besar hingga Song Kim Long poenja pakean samoeanja djadi basa maka ia lantas berlari pergi di geredja Kwan Tee Bio, itoe waktoe Song Kim Long ada di dalem geredja Kwan Tee Bio, ia poenja badan kedinginan dan ia poenja peroet kelaparan, itoe hoedjan toeroen dari pagi sampe tengahari baroe bisa brenti, lantas Song Kim Long kloear koembali dari geredja Kwan Tee Bio itoe, kira-kira ia berdjalan belon brapa tindak djaoenja ia ketemoe satoe orang ia itoe bapanja poenja sobat baek Lauw Soen Tjoan, tetapi Song Kim Long tiada brani tegor padanja, banja Song Kim Long berlaga tiada kenal dan ia troes lari, tempo Lauw Soen Tjoan dapet lihat Song Kim Long, lantas Lauw Soen Tjoan panggil padanja sembari menanja: Kong Tjoe maoe pergi kamana, kenapa Kong Tjoe sampe begini roepa?
Serta Song Kim Long ketemoe pada Lauw Soen Tjoan, lantas Song Kim Long poenja ajer mata kloear seperti hoedjan serta ia kasi tahoe satoe persatoe dari dia poenja perkara dengan dapet ke Soesahan. Lantas Lauw Soen Tjoan berkata: Memang soedah mistinja orang di doenia kaloe belon peroentoengan senang, misti lebi doeloe djalan melarat. Sekarang djikaloe Song Kong Tjoe soeka tinggal sama saja boeat merawatin di dalem praoe poenja perkara tjoemah Kong Tjoe makan kenjang boeat toekar hari sadja.
Serta Song Kim Long dengar begitoe, ia lantas berloetoet sembari berkata: Djikaloe intjek soeka adjak sama saja banjak trima kasi, tentoe saja toeroet intjek poenja prentah. Sasoedahnja habis bitjara lantas Lauw Soen Tjoan adjak Song Kim Long toeroen di dalem dia poenja praoe boeat merawatin pekerdjahannja Lauw Soen Tjoan itoe.
Adalah kira-kira Song Kim Long bantoe merawatin Lauw Soen Tjoan poenja pekerdjahan di dalem praoe sampe doea tahon lamanja, maka Lauw Soen Tjoan poenja ingetan maoe poengoet mantoe sama Song Kim Long, lantas Lauw Soen Tjoan kasi tahoe sama dia poenja istri (Tjie Sie), jang sekarang Gie Tjoen soedah besar saja poenja ingetan maoe poengoet mantoe sama Song Kim Long.
Lantas Tjie Sie berkata: Djikaloe Siang Kong maoe poengoet mantoe sama Song Kim Long itoe ada baek, sebab dia poenja bapa
