164
Liauw Tjay.
Lantas Lan Soen berkata: Tia-tia tiada boleh pertjaja itoe orang jang ada di pemboeian poenja hati, maka dia brani merampok ataoe keniaja orang, sebab dia poenja hati tiada haek, djikaloe tia-tia lepas itoe orang jang berdosa dari dalem boei kaloe dia lari tentoe tia-tia dapet dosa besar sama keiser.
Lantas Pwe Sip berkata: Kami poenja hati baek boeat mendjaga anak negri, masa orang maoe bikin djahat pada kami, dari itoe angkaoe traoesa boeat tjoeriga hati lagi. Sasoedahnja Pwe Sip habis bitjara lantas ia kloear pergi di kantornja, serta Pwe Sip doedoek di kantornja, lantas sipir dateng kasi tahoe: Orang di dalem pemboeian samoeanja kekoerangan ajer, harep Taij Djin boleh pergi preksa.
Demikian djoega Pwe Sip lantas prentah itoe sipir boeka pemboeian, soepaja itoe orang jang berdosa kloear mentjari ajer ataoe lain-lain makanan pergi pagi poelang sore di dalem sepoeloe hari lamanja. Angkaoe misti djaga itoe orang dengan hati-hati djangan sampe dia bisa lari.
Apa bila itoe sipir trima prentah, lantas ia balik poelang di pemboeian dan ia boeka itoe pintoe boei soeroeh itoe orang jang berdosa kloear pergi pagi poelang sore, serta itoe pendjahat kira kira ada doea ratoes orang dengar di boekain pintoe boei, lantas masing-masing bereboet lari kloear, hingga itoe sipir tiada bisa tahan pada marika itoe, maka di antara doea ratoes orang itoe banjak jang djahat maoe boenoeh itoe sipir dan ada djoega jang berkata: Angkaoe djangan banjak tjerita, ini waktoe Taij Lo Ja pake hati baek lepas kita orang rame-rame pergi kloear, kenapa angkaoe maoe tahan.
Tatkala itoe djoega lantas marika itoe samoeanja lari kloear, djadi sipir tiada boleh tahan. Tempo Pwe Sip dapet kabar jang itoe orang samoeanja lari dari pemboeian, hingga Pwe Sip djadi menjesel tiada bisa soedah sembari berkata: Kerna kami tiada maoe dengar Lan Soen poenja perkataän, maka ini hari ada ini perkara, kami berhati baek dengan berkesian bagi si pendjahat itoe jang tiada dapet ajer, sekarang itoe pendjahat tiada inget kesian pada kami, dari itoe maka samoeanja djadi tinggal lari tentoe kami dapet dosa sama Keiser. Begitoe djoega Pwe Sip lantas toelis sepoetjoek soerat soeroe orang bawa pergi di kota Pok Liang, sasoedahnja itoe orang trima itoe soerat lantas ia berangkat pergi ka kota Pok Liang.
Adalah di tjeritaken Srie Baginda Keiser Song Tjin Tjong serta dapet soeratnja Tie Hoe Pwe Sip, lantas Baginda berkata di antara mantri-mantrinja: Djikaloe begitoe Pwe Sip ada makan anak negri poenja smeer boeat bikin djoesta di dalem astana poenja pekerdjahan, sekarang begimana kaoe rame-rame poenja timbangan dari Pwe Sip poenja perkara.
Maka ada satoe mantri jang tahoe Pwe Sip poenja tingka lakoe, lantas ia kasi tahoe pada Baginda Keiser, katanja: Hamba tahoe betoel Pwe Sip djadi orang tiada soeka bikin djoesta sama anak negri djoega ia dengan setia hati mamegang Srie Baginda poenja pekerdjahan,
