124
Liauw Tjay.
Joe Sin berkata: Boekannja saja tiada maos toeloengin Gan Siang Kong poenja perkara, sebab itoe Kho Hoan Gwee saorang jang soesah aken kita masoek bitjara boeat minta dia poenja anak prampoean.
Gan Tjoen lantas berkata: Dari apa jang di boeat soesah, oewang saja ada brapa banjak dia maoe minta pandjer saja djoega bisa kasi, tjoemah saja harep inko toeloeng bitjarain; djikaloe lain orang poenja anak saja tiada maoe, begimana inko tiada maoe toeloeng sama saja boeat bikin djadi itoe perkara kawin sama itoe Kho Hoan Gwee poenja anak prampoean.
Serta Joe Sin dengar Gan Tjoen poenja perkataan begitoe, maka Joe Sin dapet ingat jang ianja seringkali minta pindjem oewang sama Gan Tjoen, djikaloe ia tiada maoe trima Gan Tjoen poenja prentah, tentoe boleh djadi poetoes sobat ande, dari itoe Joe Sin apa boleh boeat ia lantas trima Gan Tjoen poenja prenta, kondatinja itoe Kho Hoan Gwee saorang jang teritip boeat preksa mantoe, saboleh-boleh Joe Sin nanti masoek bitjara, ia tiada perdoeli dapet atawa tiada dapet atsal dia soedah trima Gan Tjoen poenja prentah boeat minta anaknja Kho Hoan Gwee. Maka dengan ingetannja Joe Sin itoe ia poen lantas berkata lagi: Sekarang Siang Kong djangan boeat koewatir hati lagi, nanti saja boleh pergi di roemahnja Kho Hoan Gwee.
Serta Gan Tjoen dengar Joe Sin poenja perkataan jang dengan soenggoe hati nanti maoe toeloeng padanja, maka Gan Tjoen mendjadi soeka hati serta ia rogo kantongnja kloearin lima tail oewang perak jang mana ia lantas kasi pada Joe Sin boeat ongkos sewa praoe, sasoedahnja lantas Gan Tjoen berangkat djalan poelang ka roemahnja sendiri. Tempo Gan Tjoen soedah poelang di roemahnja hingga sampe malem ia tiada bisa tidoer kerna ia boeat pikiran itoe perkara, serta sampe besok paginja Gan Tjoen lantas panggil dia poenja boedak Siauw It di soeroe ikoet sama Joe Sin boeat pergi di roemahnja Kho Hoan Gwee, apabila Siauw It trima prentah maka ia lantas pergi lebi doeloe di roemahnja Joe Sin jang lantas adjak Siauw It toeroen di praoe sama-sama berangkat pergi di tempatnja Kho Hoan Gwee.
Kerna itoe waktoe Gan Tjoen poenja pikiran kalang kaboet, maka dari itoe ia lantas pake-pakeannja akan pergi di geredja Kwan Tee Koen, sasoedahnja ia lantas berangkat pergi di geredja itoe di mana ia meniat boeat tanja sama melekat Kwan Tee Koen, dari dia poenja peroentoengan djodo, sasoedahnja itoe lantas Gan Tjoen ambil boengboeng jiamsie jang mana ia lantas kotjok itoe tjiamsie di depan gambarnja melekat Kwan Tee Koen, serta kloear aatoe batang tjiamsie noemoer toedjoe poeloe tiga maka di dalem itoe tjiamsie perkataännja ada, koerang baek, tempo Gan Tjoen soedah lihat itoe tjiamsie lantas ia mendjadi mara troes ia kloear dari geredja itoe berdjalan poelang ka roemahnja. Sasoedahnja Gan Tjoen sampe di roemahnja, ia poen doedoek berpikir tentoe ini perkara djodo soesah mendjadi, sebab dia poenja roepa djelek sekali, maskipoen ia ada poenja banjak harta bauda djoega pramposan tiada soedi aken roepa-
