— 1191 —
pada Hok Tjoen, dan hal ini bisa dapet kenjata'an begimana ia sering njataken bentji dan laen-laen pengrasa'an pada swaminja sendiri.
Di hari pertama Hok Tjoen brangkat, hari itoe djoega Bauw Si telah oendang Joe Kong dateng ka roemanja, di mana ini doea menoesia kedji bersoeka-soeka hati dengen tiada saorang boedjangnja jang di boeat maloe.
Bermoela Joe Kong tjoema dateng di waktoe malem sadja, tapi lama kelama'an djadi lebi brani dan siang-siang hari poen dateng mengoendjoengken, sampe achir-achir bergalang-goeloeng seperti swami dan istri.
Pada satoe hari, selagi itoe doea menoesia binatang bersoeka-soeka hati makan minoem, dengen tersipoe sipoe boedjang prempoean dateng kasi taoe, Bauw Hian soeda poelang dan lagi mendatengin.
Joe Kong lantas bangoen dan maoe pergi mengoempet, tapi Dji Hoa menjega dan berkata; Kau maoe pergi ke mana? Kau mengoempet djoega tiada goenanja, kerna tiada oeroeng orang soeda dapet taoe; doedoek sadja di sini, boeat apa perdoeli sama ia orang!"
„Ah, mana bole djadi!" kata itoe lelaki keparat jang dapet djoega pengrasa'an takoet, „Kaloe Bauw Hian liat akoe ada doedoek bersama kau tentoe ia menanja, begimana akoe moesti kasi djawapan padanja?"
