— 1179 —
manis dari moeloetnja orang. lelaki lantas pertjaja sasoenggoenja. Begitoe djoega hal ini telah kedjadian atas dirinja Joe Siotjia, jang lantaran denger bitjaranja Hok Tjoen begitoe manis dan djoedjoer, boekan sadja djadi pertjaja, malah ia poedji dan seselken dirinja jang soeda berlakoe kaboeroe napsoe.
„Kau sendiri soeda denger njata bitjaranja itoe orang moeda, dan di sini baroe kita dapet kenjata'an, orang itoe ada satoe pamoeda jang boediman," begitoe kata Joe Si pada Heng Hoa, „sekarang akoe menjesel soeda berlakoe kaboeroe napsoe, sampe menerbitken ini katjilaka'an pada diri sendiri."
Maski begitoe, hal ini Siotjia tiada boleh lantas pertjaja," kata Heng Hoa jang masi merasa tjoeriga.
Sedeng begitoe praoe djalan teroes dengen tiada koerang ladjoenja. Tiga hari telah berselang dan bener Hok Tjoen tiada dateng ka tempat Joe Si, hingga kaliatan itoe orang moeda bener-bener tiada mengandoeng niatan djelek. Lo Keng jang setiap hari bawa makanan poen tiada brani masoek ka dalem, selaennja panggil Heng Hoa dan itoe boedak jang bawa kahadepan nonanja.
