— 1651 —
tjoba swamikoe terangken, perkara apa jang membikin kau kaliatan begitoe bersoekoer?"
„Eh, mana Te hoe Thio Sie?" kata itoe Wangwe jang soeda djadi keroepoekan lantaran girang.
,,Mana dia?"
,,Ia ada di dalem, akoe nanti panggil bila perloe," saoet Peng Si.
„Panggil doeloe padanja, soepaja kita orang sama-sama bisa mendenger ini kabar girang. . ."
Koetika Sian Wan-gwe berkata sampe di sitoe, Thio Si soeda dateng mengadjak doea orang soeroean tadi, jang masing-masing soeda isi kenjang peroetnja.
,,Akoe soeda denger ini doea orang poenja tjerita, sasoenggoenja hatikoe merasa sanget girang, " kata Thio Si, hingga hal itoe membikin Peng Si djadi sanget heran; terlebi poela koetika liat itoe doea orang soeroean.
,,Orang apa ini?" ia menanja.
,,Inilah orang jang mengabarken itoe perkara girang," kata Wan-gwe, Sioe Eng dan adé Sioe Tji masing-masing soeda dapet pangkat jang moelia...."
,,Ja akoe poen dapet ketrangan dari ini doea orang seperti begitoe," kata Thio Si.
„Boekan ketrangan lagi, tapi memang sabenernja," saoet Sioe Djin.
Peng Si kliatan masi tinggal gelap dalem itoe oeroesan, tapi sasoedanja swaminja kasi taoe begimana hal itoe telah terdjadi, serta oendjoekin djoega soeratnja Song In, baroelah itoe njonja mendoesin dari poelesnja.
,,Oh, Djiwie Hiantjek masing-masing soeda
