— 1599 —
„Koendjoengan jang ka ampat boleh di bilang ada paling mennjediken,“ saoet poela Thia Si. „Pada waktoe terbit bahaja bandjir, di mana ini gedong Tin Kok Hoe soeda kena karendem aer, itoe waktoe bersama Lo Djim itoe njonja bangsa- wan telah dateng di sana dengen pengharepan boeat noempang semantara waktoe lamanja, tapi perminta'an itoe boekan sadja tiada di trima, malah Dji Hoa soeda toetoep pintoenja dan kasi taoe, roemanja sanget sempit, tiada bisa trima laen orang boeat tinggal di sitoe. Tjobalah pikir, apa itoe ada perboeatannja satoe mantoe jang baek?“
Tjeng Bwe djadi berdjingkrak lantaran maranja. „Akoe sendiri baroe perna dapetken ada saorang jang begitoe kedjem dan dengki seperti Bauw Si itoe,“ kata Tjhia Si.
„Sekarang Ko Taij-Taij ada di mana?“ menanja Bong Loan.
„Sedari itoe waktoe akoe tiada dapet taoe lagi,“ saoet Tjhia Si, „ini gedong roepanja soeda djadi kosong.“
Omong poenja omong, mata hari soeda ampir silem, maka Bong Loan lantas berkata: „Sekarang baeklah sama-sama akoe pergi ka dalem kota, di sana kau boleh bikin soerat pengadoean, dengen apa orang boleh madjoeken itoe di hadepan hakim Djika menilik sebagimana jang kau telah toetoerken.
