— 1560 —
――„ Baek, itoe semoea akoe nanti toetoerken di hadepan Goanswe, tapi dengen pengharepan tiada djadi menjesel, bila dalem ini oeroesan nanti djadi berbalik laen roepa."
―„ Kenapa bisa berbalik laen? Inilah akoe tiada mengarti!"
„Djikaloe akoe belon menoetoerken hal itoe, soeda tentoe sadja bagi Goanswe tiada nanti dapet taoe apa-apa," saoet In Liong.
„Tjoba toetoerken itoe semoea, akoe bersedia aken mendengeri," maminta Bong Loan.
―„ Djadi sekarang Goanswe mengidjinken?"
―„Tentoe."
In Liong berdiam sabentaran, kamodian dengen teges ia berkata: „Soeda sakean lamanja akoe terloenta-loenta, menanggoeng banjak kasoekeran, itoe semoea dari lantaran kedjahatannja akoe poenja iboe tiri, boeat mana akoe tiada bisa loepa, akoe selaloe menanti datengnja waktoe jang baek akoe bikin pembalesan. Dalem itoe kasoesahan beroentoeng akoe soeda dapet pertoeloengan dari radja di Pak Hoan, di mana sakean lama akoe semboeniken nama sendiri dan menjamar begini matjem, dengen tiada saorang mendapet taoe. . . . . . . . . . . . . ."
„Djadi kau ini orang apa?" menanja Bong Loan sambil potong orang poenja pembitjara'an. Ia memandang pada si tjantik dengen merasa tjoeriga.
