— 1513 —
Ia denger berkali-kali, saban liwat di tempat jang terdjaga, orang seboet itoe kita poenja moesoe! dan laen-laen perkata'an poela.
Satelah liwatken pintoe jang ka tiga, di sitoe ini doea panglima Hoan Kok dapet liat satoe lods besar, dan itoelah satoe pengliatan jang sanget menjediken hatinja ia-orang berdoea. Itoe lods ada djadi tempatnja soldadoe-soldadoe jang loeka dan lagi berobat, antara mana, sebagian besar ada tentara Pak Hoan.
Saban-saban kadengeran swara merinti dan ratap-ratapan jang mengantjoerken hati.
Poet Hoa dan Ang Kokkioe berdjalan lebi tjepet, ia ingin lantas liwatken itoe lods, jang soeda membikin hatinja seperti di tarik-tarik.
Belon brapa djaoe ketemoe poela lods sematjem itoe, tapi lods itoe boekan tempat orang seperti jang tadi, hanja ada mendjadi tempatnja orang-orang jang kena di tawan, dan tangannja saloe persatoe ada memake rante.
Di sitoe ampir sadja itoe ferdana-mantri dan Kokkioe dari Pak Hoan tiada bisa djalan lebi djaoe, kerna semoea orang jang ada di sitoe koetika liat padanja, masing-masing lantas menanja begini atawa begitoe.
Soenggoe pengliatan itoe ada membikin tiada enak sekali hatinja itoe doea pembesar asing. Tapi achir-achir ia orang soeda liwatken itoe
