— 1487 —
„Boekan, boekan begitoe!“ kata Kokkioe. Brangkali moesoe ada goenaken ilmoe siloeman!“
„Tapi akoe tiada perdoeli marika goenaken ilmoe setan, ini sekali tiada bole tiada akoe moesti kasi bagian jang sedep!“ kata Ya Loet Sioe San sambil madjoeken koedanja menerdjang pada itoe panglima prang jang berpakean serba poeti.
Lagi-lagi moesoenja itoe kasi liat permaenan langka sariboe. Boekan sadja bagitoe, ini sekali baroe sadja orang maoe menerdjang, ia lantas bri tanda pada tentaranja dan teroes lari.
„Sekarang, ka mana djoega kau lari, tiada oeroeng akoe nanti kedjer!“ kata Ya Loet Sioe San dengen sanget gergetan, dan ia lantas prenta tentaranja mengoedak pada barisan moesoe.
Baroe sadja marika itoe maoe mengedjer, mendadak dari djoeroesan sebla Oetara kadengeran lagi swara tetaboean prang; Prins Ya Loet djadi bingoeng, mana maoe mengedjer mana moesti menangkis, tapi sigra ia ambil poetoesan aken menanti itoe pasoekan jang lagi mendatengin.
Ini barisan jang baroe sampe, jalah bener ada barisannja Bong Loan, sedeng jang tadi, jalah ada panglima-panglim alaen, jang menjaroe dan pake namanja itoe kapala prang prempoean.
„Sekali ini kita haroes berlakoe keras,“ kata itoe kapala prang, „kaloe moesoe lari, djangan kasi tempo hanja lantas kedjer padanja, tjingtjang marika itoe satoe persatoe!“
