— 1129 —
kata An Djin sembari tarik tangannja Dji Hoa dan di soeroe doedoek kombali.
„Soeda, esok toeroet akoe sama-sama pergi ka sana," kata Bauw Wan-gwe.
„Tida, akoe tra nanti maoe boeat mengindjek lagi roema tangganja familie Ko, jang akoe pandang sebagi noraka di kolong doenia!" nerembel Dji Hoa dengen sanget ketoesnja: „Itoe Hok Taij Taij, jang orang kata ada djadi akoe poenja mertoea, tapi ia itoe akoe pandang biang iblis jang nanti ambil djiwakoe dengen paksa!"
Sedeng kata begitoe, ini prempoean djoedes jang lantaran terlaloe di sajang dan di kasi hati hingga djadi mangkak, sigra merosot toeroen dari pembaringan dan bergoeling-goeling di djoebin.
„Kaloe tiada maoe soeda, kenapa ini anak bolenja djadi begini!" menggrendeng An Djin sambil pondong ia poenja „Popwe" ka atas randjang, sedeng Bauw Kong beroelang-oelang mengela napas.
Kamodian ia telah tarik tangan mantoenja di adjak ka pertengaän depan.
„ Akoepoen tiada abis pikir kenapa Dji Hoan tiada bisa boeang itoe adat seperti di waktoe masi ketjil," kata ini orang hartawan pada mantoenja.
Hok Tjoen denger begitoe lantas tertawa oeroeng seraja garoek-garoek kapala, sedeng anggota itoe tiada sekali merasa gatel.
