— 1446 —
boeat bikin itoe orang bangsawan tiada djadi mara, tempo liat Kwe Si berdiam sadja, ia lantas kata: Kou Kongtjoe dan Siotjia doea-doea tiada ketaoean ka mana perginja, kerna koetika terdjadi kariboetan dengen tiada saorang dapet taoe ia telah melariken diri.
Ko Kong tertawa, tapi dengen mata melotot ia pandang moekanja itoe prempoean toea.
„Apa kau brani tetepken dengen soempa, perkata’an itoe tiada djoesta?”
Tjo Mama berdiam sadja, itoe sedikit pertanja'an tjoekoep membri arti aken ia poenja penjaoetan jang melantoer.
Kombali orang bangsawan kita tertawa. la lantas oeroekin itoe doea orang dengen bebrapa pertanja’an: „Tjobalah angkau kasi ketrangan, siapa adanja itoe orang jang soeda di boenoe oleh Tjo Kongtjoe di goenoeng Ngo Siong San? Siapa jang soeda djoeal Keng Hoa Siotjia dalem sala satoe roema plesiran di Djin Ho? Siapa jang soeda goenaken akal kedji, sampe Kou Kongtjoe di jeblosken dalem pendjara?"
Ini bebrapa perkata'an soeda bikin hatinja itoe doea orang sebagi tjopot, kamodian dengen berbareng lantas berkata: Lo Ya poenja pertanja'an akoe tiada bisa dijawab kerna hal itoe sama sekali akoe tiada dapet taoe."
