— 1435 —
„Hm, itoe orang soeda klaboein kita poenja mata, maka sekarang kita moesti tjari akal boeat dapetin ia poenja oewang,“ kata Kwe Si. „Lagi semalem, koetika ia soeda masoek tidoer, iseng-iseng akoe dapet kenjata'an ada banjak barang permata, jang kaloe di djoeal barangkali bisa dapet bebrapa ratoes tail prak. . . . . !“
„Ah, kau ngimpi brangkali!“ kata Tjo Mama sambil tertawa.
„Biar......ah, kaloe akoe soempa djadi tiada baek,“ kata Kwe Si dengen swara tetep.
„Kau taoe akoe boekan anak ketjil, begimana akoe brani berdjoesta!“ Tjo Mama liat begitoe lantas bertreak girang.
„Sekarang kita moesti tjari akal, soepaja itoe sekalian permata djato ka dalem kita poenja tangan.“ kata Kwe Si lebi djaoe.
—„Begimana kita moesti berboeat?“
―„Bli arak serta boea-boea, kita adjak Ong Ma minoem, kaloe soeda mabok kita djorokin ka aer.....“
„Ssstt! Omong pelahan sedikit!“ kata Tjo Mama sembari menoendjoek pada itoe praoe besar. „Di siloe akoe denger ada banjak orang, kaloe marika denger kita poenja omongan begitoe roepa, nistjaja djadi tiada oeroes!“
„Akoe rasa itoelah ada tipoe jang paling bagoes,“ kata poela Kwe Si dengen swara berbisik, „kaloe
