— 1127 —
deng di roema sendiri poen tiada kedoengsakan. Taij-Taij tiada boleh anggep dirinja paling kaja, kerna akoe poen teritoeng orang hartawan jang blon boleh diperhinaken. Lagi kau tentoe liat dan rasaken sendiri, begimana slama ada di sini akoe bikin padamoe?Akoe rawat begitoe baek dan perloe, tapi kenapa Dji Hoa dibikin begitoe? Terlaloe toch!"
Sebagimana di atas telah ditoelis. Hok Tjoen ada berdjandji apa-apa pada Soen Nio, tapi sasoeda denger bitjaranja An Djin, liat begimana Dji Hoa menangis segak-segoek, itoe semoea bikin hatinja djadi berbalik. Dan boekan sadja begitoe, malahan sebaliknja ia anggep Soen Nio jang menerbitken lantaran dan bersala.
,,Ini kedjadian harep Hiansaij djangan boeat taro di hati, seande anakkoe sala, dengen pengharepan kau soeka membri maäf dan kasi mengarti dengen tjara jang pantes." kata Bauw Wan-gwe. Selama-lamanja kau moesti pegang kemoedi dan bikin rapet pertjintaän swami-isrti, kerna tjoema itoe djalan sadja jang nanti bisa bikin roekoen dan beroentoeng dalem oeroesan roema tangga,"
Seabis kata begitoe Wan-gwe prenta boedaknja ambil thee, dan kasi pikiran djoega pada istrinja aken bikin soeda sadja itoe semoea.
,,Sebaliknja akoe minta Gakhoe dan Gakbo
