— 1426 —
Semingkin lama itoe orang dateng semingkin deket, dan sabentar lagi djoega telah sampe di itoe bawa poehoen, di mana Kwe Si dan Tjo Mama telah brenti.
„Astaga! kenapa kabetoelan kita orang bertemoe di sini!“ kata itoe prempoean toea jang baroe sampe koetika liat pada itoe doea orang, Kwe Si tiada mengenalin, tapi Tjo Mama kenalin, bahoea orang itoe poen boekan laen, jalah Ong Ma. Ini njonja kapala roema hina lantas menghamperi, ia orang bertiga lantas doedoek mendeprok di tana.
„Kaloe begitoe Naij-Naij djoega soeda djadi seperti kita orang, jang maoe dikata boeron boekannja boeron, tapi mirip sebagi orang pelarian,“ kata Kwe Si.
„Apatah maoe dikata,“ kata Ong Ma seraja mengela napas, „bahaja ini boekan kita orang sadja jang menampak, hanja semoea orang di dalem kota.“
„Tjoba liat itoe,“ kata Tjo Mama sambil menoendjoek ka djoeroesan kota dengen tangannja, „itoe api masi tinggal menjala roepanja!“
Kwe Si dan Ong Ma lantas memandang ka itoe djoeroesan jang dioendjoek, di mana ada kaliatan asep mengeboel moelek ka tenga oedara.
„Oh, itoe kawanan bangsat!“ kata Kwe Si.
