— 1365 —
tiaapoengannja itoe sekalian tentara negri. Dengen sebagian barisannja jang kira-kira masi berdjoembla bebrapa ratoes orang, itoe Koensoe lari ka djoeroesan Oetara.
Ko Kong bri tanda pada marika itoe aken mengedjar teroes.
Koetika mengedjar kira-kira doea poeloe li djaoenja, di satoe tempat ia orang bertemoe satoe pertempoeran heibat, di mana Pa Koensoe soeda kena terkoeroeng rapet dalem barisannja tentara negri jang di kepalaken oleh Sianhong Sian Sioe Eng, jang dengen pasoekannja paling doeloe telah sampe di itoe tempat, sedeng barisannja Tjo Goanswe djalan blakangan.
Dengen njata Ko Kong dapet liat itoe kepala begal lagi bertanding dengen seroe sekali sama satoe panglima moeda jang berpakean badjoe prang poeti. Ia merasa sanget kagoem meliat kegagahannja itoe pamoeda, kerna maski poen tandingannja ada begitoe tegoe, tapi tiada oeroeng soeda bisa melawan dengen sengit sekali.
„Masi begitoe ketjil itoe orang soeda pande dalem perkara silat, kamodian hari tentoe bisa djadi saorang militare jang berharga,“ begitoelah diam-diam Ko Kong memoedji di dalem hatinja.
Ini orang bangsawan madjoeken koedanja lebi deket dan ati-ati. Ia kliatan djadi kaget dan kata poela: „Heran sekali, moekanja itoe panglima
