— 1354 —
begal, dan dengen ambil itoe djalanan ketjil di blakang goenoeng, marika itoe sigra melariken diri.
Ini hal telah kedjadian pada bebrapa hari di moeka seblonnja Tjo Goanswe dateng menjerang ka goenoeng Yauw Taij, maka koetika ini Generaal sampe di sana, ia dapetken itoe goenoeng dan pasanggrahannja soeda tiada terdjaga.
Lebi doeloe ia prenta bebrapa orang pergi masoek ka dalem goenoeng dan bikin pepreksa'an perkara apa ada terdjadi di sana; tiada lama orang jang di prenta soeda balik kombali dan kasi taoe, pasanggrahan brandal soeda djadi kosong, tiada ada orang barang satoe.
Tjo Goanswe djadi tjoeriga, kerna kwatir Pa Koensoe ada atoer tipoe jang bisa membikin tjilaka ia dan barisannja.
Ia sendiri lantas madjoeken barisannja, tapi lebi doeloe bikin pepreksa'an di sana sini, sasoedanja ternjata bener itoe kawanan ketjoe soeda oendoerken diri, baroe rame-rame masoek ka dalem pasanggrahan.
Di sana sini lantas dipreksa, tapi tiada kedapetan barang-barang jang ada harganja, selaennja balok dan laen-laen lagi jang malang melintang di koeliling pasanggrahan.
Tjo Goanswe lantas njalaken api dan bakar itoe pasanggrahan, jang dalem sakedjepan sadja soeda djadi lapangan.
