— 1349 —
Dalem itoe perdjamoean satoe persatoe panglima prang telah membri slamet pada Tjo Goanswe, marika itoe poedji kepandeannja itoe Generaal, jang dengen sedikit pikiran sadja soeda membri asil begitoe bagoes.
„Goanswe poenja tipoe daja jang pertama soeda berdjalan baek, maka kita orang harep sateroesnja dalem ini peprangan nanti selaloe beroleh kaberoentoengan seperti jang soeda,” kata itoe sekalian panglima.
„Itoe semoea kau tiada boleh djatoken atas dirikoe sadja,” saoet Tjo Goanswe, „sedeng kaloe dalem itoe peprangan soeda bisa dapet kamenangan bagoes, adalah dari lantaran angkau sekalian poenja tenaga, jang soeda bekerdja dengen soenggoe hati.”
Penjaoetan itoe telah di samboet dengen girang oleh semoea orang.
„Besok kita orang moesti madjoeken poela seantero barisan aken menjerang ka tempatnja moesoe,” kata Tjo Goanswe poela.
„Dalem peprangan ini begimana Goanswe maoe berlakoe?”
Inilah akoe belon bisa bilang apa-apa, sablonnja menilik doeloe begimana dengen keada'annja moesoe di atas goenoeng. Tapi di sini akoe peringetken, kemaren itoe orang kasi ketrangan, Pa Koensoe sanget pande mengatoer pakerdja'an,
