— 1303 —
Ja, laen kali akoe nanti perhatiken kau poenja perkata'an, Hiante," saoet Boen Pa. Tapi sebaliknja ini kakliroean soeda berbalik dengen satoe hal jang kabetoelan. Betoel tiada?"
Song In benerken bitjaranja Boen Pa.
Begitoelah pembitjara'annja itoe doea orang selama ada di tenga djalan. Satelah sampe pada esok paginja, Tjo Boen Pa dan Song In sigra kasi masoek namanja pada minister dari oeroesan prang, jang kamodian lantas kirim itoe semoea nama ka kantoorannja Goanswe.
Bong Loan 'moelai preksa itoe soerat-soerat jang di kirim padanja, di mana ia lantas membri poetoesan: Tjo Kheng di angkat djadi Peng Lam Taij-Goanswe, Sian Sioe Eng Dji-Lo Goanswe. Ma Leng In, Lo Hong Beng, Ong Poei, Soe Peng masing-masing di angkat mendjadi Tjam Bouw, Ouw-Jan Peng, The Tok, Beng Jang, Tjiauw Eng dan bebrapa orang poela di pakerdjaken dalem ia poenja angkatan prang.
Itoe hari djoega telah di wartaken pada orang-orang jang telah beroleh pangkat, sementara poetoesannja Taij Goanswe sigra di persembaken sama Baginda Keizer.
Menoeroet titanja radja, pada itoe hari telah di boeka pesta besar, di mana boekan sadja orang-orang jang dapet pangkat ada doedoek berdjamoe, djoega sekalian pembesar toeroet bersoek-soeka hati.
