— 1300 —
Tjo Boen Pa tepok tangan, kerna ternjata moeridnja sampe tjoekoep taba. Djika kedjadian pada saorang jang goegoep, nistjaja djiwanja aken djadi binasa. Bong Loan poen toeroet poedji itoe kasebetan.
Kombali pertandingan dioelangin lagi. Satoe poekoel jang laen menangkis, masing2 kaloearken kepandeannja! Bong Loan kepaksa moesti kaloearken ia poenja ilmoe silat jang dapet trima dari Liong Taij Koen, kerna kaloe tiada goenaken itoe bebrapa djalan, ia merasa tiada oengkoelan boeat bertanding sama itoe pamoeda jang selaennja sanget sebet dan pande, djoega tenaganja sanget besar, serang serangannja ada sanget berbahaja.
Satelah pertandingan sampe di achirnja, Bong Loan angsoerken tangannja pada Song In, jang dengen berloetoet laloe samboetin itoe.
„Sasoenggoenja Sian Hiante haroes dipoedji, apa jang ia soeda kasi oendjoek baroesan, itoe sadja ada tjoekoep boeat akoe mendapet taoe, bahoea ia ada saorang .moeda jang gaga perkasa.”
„Goanswe poenja poedjian terlaloe tinggi boeat akoe saorang jang renda dan lema," saoet Song In.
Marika itoe sigra balik poela ka tempat tadi, di mana lebi doeloe Tjeng Bwe soeda sediaken arak dan brapa roepa boea-boea.
Bong Loan sigra ambil satoe tjawan arak isi-
