— 1295 —
ka kota radja, satelah dapet taoe itoe orang moeda perloenja maoe toeroet ambil oedjian, dengen girang ia berkata; Boeat Hengtiang poenja kedatengan ini ada sanget kabetoelan. Baginda djoestroe maoe tjari orang gaga boeat djadi panglima prang di Selatan, di mana pada masa ini ada terbit pembrontakan dari rahajat negri dan kawanan pendjahat di sana. Esok akoe nanti pergi ketemoeken Baginda Keizer dan poedjiken Hengtiang poenja nama, soepaja bisa dapet pangkoe itoe djabatan Peng Lam Taij Goanswe."
„Trima kasi atas Goanswe poenja niatan jang begitoe moelia," saoet Tjo Boen Pa dengen sanget girang, tapi sebaliknja bila Goanswe ada begitoe moera hati, akoe ada laen perminta'an dan harep Goanswe ampoenja pertoeloengan."
„Boeat perkara apatah?" Menanja Bong Loan. „Tjo Heng soeda saksiken sendiri, boeat perkara jang ada terantjem hoekoeman dengen senang akoe soeka menoeloeng. Maka dari itoe bilang sadja djangan maloe-maloe; apa jang akoe bisa tentoe nanti menoeloeng sebagimana moestinja."
„Akoe ada poenja satoe temen Sian Sioe Eng namanja, orang itoe bersama-sama akoe dateng di sini, sekarang dia ada di roema penginepan, kata Boen Pa. Itoe orang ada mengarti djoega prihal ilmoe silat, tenaganja poen tjoekoep, lagi masi moeda, maka kaloe ada pakerdja'an jang ter-
