— 1260 —
katemoe di tenga djalan, begitoe lekas ia soeda kenali padakoe dan berdjingkrak-djingkrak sebagi merasa sanget girang. Liatlah, satoe binatang begitoe baek, jang soeda membri banjak pertoeloengan padakoe, begimana akoe tiada maoe bimbang aken dapetken kombali? Sekarang ini, bila Hiante kwatir katinggalan dalem oedjian, baeklah kau brangkat sadja lebi doeloe, akoe maoe pergi tjari lagi sampe bebrapa hari, kamoedian akoe nanti menjoesoel ka sana."
„Abis kaloe achir-achir itoe koeda tiada dapet di katemoeken begimana?" menanja Song In.
„Biar begimana djoega akoe moesti tjari padanja. Tegesnja sabegitoe lama blon di ketemoeken, sabegitoe lama djoega akoe aken mengider koeliling tempat.
Sedeng berkata begitoe, bebrapa ketes aer mengoetjoer di matanja itoe orang moeda, hingga Song In meliat begitoe djadi toeroet merasa doeka.
„Kaloe Hengtiang bilang begitoe, akoe poen tiada bisa memaksa," kata ia, kita brangkat dari roema bersama sama, biarlah djadi ketinggalan dalem oedjian, akoe moesti toenggoe sampe Hengtiang dapetken kombali itoe koeda jang telah ilang."
„Tapi Hiante djangan sala mengarti," kata Tjo Kongtjoe. „Oeroesankoe ini ada oeroesan kaperloean aken goena diri sendiri, sedeng apa jang
