— 1106 —
Joe Kong poela, „anterin akoe pada Dji Hoa; sama siapa akoe dapet kepastian, apa akoe nanti dapet seande akoe toetoep diam ini resia boesoek?"
Itoe boedjang prempoean saking takoet kepaksa toeroet itoe permintaän. Ini doea orang lantas masoek ka dalem, di kamarnja Dji Hoa.
„Kenapa kau boekan pergi tidoer?" menanja Dji Hoa tempo liat boedjangnja balik lagi: Apa kau soeda pergi anterin Hok Siang.. . . . . .?"
Blon abis ia berkata, Joe Kong di loear kamar bikin poetoes perkataännja dan kata: „Hok Siangkong soeda dianteri poeloeng, tapi sebagi gantinja orang jang soeda pergi, Joe Siangkong sekarag ada di sini." Berbareng dengen perkataännja ini pendjoedi singkap krenja pintoe dan masoek ka dalem orang poenja kamar.
„Siapa ini?" Dji Hoa berseroe dengen kaget dan bangoen berdiri seraja liatin moekanja orang moeda, jang achirnja ia kenalin siapa adanja. Ia lantas menegor lagi sembari kasi oendjoek roepa koerang senangnja; atas prenta siapa dan kenapa begitoe koerang adjar Joe Kong brani masoek dalem kamarnja satoe gadis seperti ia?
„Hajo lekas pergi! kaloe tiada akoe nanti mendjerit dan kau bisa dapet tjilaka! mengoesir Dji Hoa seraja mengantjem.
„Apa, kau brani seboet dirimoe satoe gadis?
