— 650 —
Meliat iboenja masoek, si nona lantas lepas pitnja sambil berbangkit dan silaken dengen hormat iboe itoe berdoedoek.
Tjheng Bwe tocang thee boeat itoe njonja bangsawan, sedeng ini njonja menghampirken medja anaknja.
„O, kaloe begitoe anakkoe pande djoega menggambar ?” kata itoe iboe sambil menoendjoek pada gambar jang terletak di atas medja dan jang baroe diwarnaken sabagian sadja.
„Ja, tapi tida boleh dibilang pande,” sapet Ko Slotjia, sebab di dalem hal ini poen akoe tiada bergoeroe.
„Tapi toch sampe bagoes,” kata poela itoe iboe sambil angkat itoe sapotong soetra dan awasin petaännja dengen merasa kagoem.
Itoe gambar ada meroepaken satoe gadis eilok, jang kaliatannja seperti orang sedeng menanggoeng doeka lagi berdiri di tepi soengei, di sapandjang tepi mana ada toemboe banjak poehoen Lioe, jang daonnja soeda moelai koening, sambil peloekin satoe batoe besar.
„Ini gambar tentoe djoega ada hikajatuja, tidakah bener, anakkoe ?” kata poela sang iboe sasoeda taro kombali gambar itoe di atas medja.
