— 630 —
malahan angkat kapala, boeat awasin sadja paras si nona, ia tida brani.
Sedeng begitoe, Ko Siotjia soeda merasa tida sabar boeat biarken itoe djahanam menggretjok lebi lama dalem kamarnja. Maka ia lantas bilang teroes-terang pada itoe lelaki kedji, begimana, sadari menoempang tinggal sama Toakoenja ia soeda pegang itoe adat kabiasaän, bahoea ia melaenken bisa trima soedara lelaki dateng dalem kamarnja, kaloe soedara itoe hendak membri nasehat apa-apa, dan dari sebab demikian, maka ia sanget harep, apabila kadatengan Hok Tjoen boekan dengen ada mengandoeng maksoed begitoe, ini soedara soeka lantas berlaloe dari kamarnja.
Sasoeda dapet ini tegoran, jang membikin moekanja djadi mera, baroelah itoe lelaki kedji inget, dengen berkahendak apa ia dateng di itoe kamar.
„Och," kata itoe djedjaka bangor dengen swara goegoep-goegoep, kaloe tida ada perkara penting, akoe djoega tentoe tida brani dateng gretjokin kau. Kemaren, koelika akoe djalan-djalan di kota, akoe dapet satoe kabar jang amat penting, kabar mana kaloe kau dapet denger, akoe kira kau poen tentoe toeroet merasa girang."
