— 990 —
tjaij ambil the soegoeken pada tetamoenja, sasoedanja itoe baroe ia menanja apa-apa pada Tjo Kongtjoe serta minta dibri taoe djoega she dan namanja ia poenja temen. Atas pertanja'an sobatnja itoe, dengen tiada sangsi-sangsi Tjo Kongtjoe seboetken she dan namanja In Liong Kongtjoe, djoega bri taoe sebab-sebabnja jang membikin ia menjamar setjara prampoean.
Sasoeda denger petoetoerannja Tjo Kongtjoe, roepanja Wie Sioetjaij djadi kaget sekali, tetapi dari aer moekanja jang bersorot sedikit terang ada mengoendjoek bagi kita, bahoea ini toean roema merasa teramat soekoer jang itoe doea orang soeda tiada dapet halangan apa-apa dalem perdjalanannja. Lebi djaoe ia poedji pada Tjo Kongtjoe, jang saban-saban soeda membri pembelaän dengen sagenap djiwa pada sobat-sobatnja jang beroleh tjilaka.
„Akoe rasa Dji wie Hiante blon makan, nanti akoe pergi bli arak dan prenta sediaken barang hidangan" kata Wie Sioetjaij kamodian dan prenta istrinja atoer barang makanan boeat itoe doea orang.
„Disini tiada ada makanan jang baek, ada doea tiga roepa sajoer jang soeda dingin, ini terlaloe sekali kaloe di soegoeken pada tetamoe," kata Boe Si. „Begini waktoe biasanja roema makan Thian Hiang Koan bien di toetoep, maka baeklah swamikoe pergi beli sadja di sana."
