— 957 —
Mendenger begitoe, ini pembesar laloe prenta orang-orangnja bikin pengedjeran. Koetika sampe di laen kota dari brapa orang jang ditanja marika dapet katrangan, betoel tadi magrip ada orang mencenggang satoe koeda lari ka djoeroesan Timoer-Oetara. Ini orang-orang politie waktoe maoe brangkat trima pesenannja Jam Tikoan, jaitoe: siapa-siapa jang bisa tangkep Tjo Kongtjoe aken dipersen doea poeloe tail perak, maka tiada oesa diboeat heran kaloe marika soeda lantas mengedjer dengen keras ka itoe djoeroesan jang dioendjoek.
Slama itoe, doea pamoeda kita soeda lari kira-kira lima li djaoenja dari kota; didoega orang tiada nanti mengedjer terlebi djane, tapi doegaän Itoe ternjata tiada bener, kerna itoe tempo di sebla blakang ada kalialan api obor dan terdenger djoega swara orang banjak.
Hal ini bikin In Liong Kongtjoe merasa takoet, beroetang-oelang ini ia mengela napas dan njataken poetoes pengharepan. Aken tetapi tiada kedjadian begitoe dengen Tjo Boen Pa. Ini orang moeda jang memang terkenal soeka berkiai, itoe tempo ada bernapsoe keras sekali boeat mengadoe djiwa sama itoe orang jang mengedjer padanja. la djadi dapet itoe pikiran nekat adalah lantaran Kou Kongtjoe jang sabentar-bentar njataken takoetnja dan saban-saban menanja, begimana ia-orang moesti berbeeat di itoe waktoe.
