— 913 —
Saking sedi-sedinja orang moeda kita tiada bisa oetjapken sepata perkataän, selaennja tekap moekanja dengen doea tangan sembari menangis. The Koen dan Nio Sie kaloear dari kamar tadi sasoedanja berpamitan sama Tjin Hie dan Cipier Tjoei Tjeng, ini swami istri landjoetken teroes perdjalanannja.
Sedari abis makan obat, keadaännja Kongtjoe kita ada lebi baek dari biasanja. Tjin Hie jang biasa anterin nasi satoe hari doea kali tapi itoe waktoe tiga kali dalem satoe hari.
Boeat goena Kokonja poenja makan setiap hari, sebab tiada ada oewang, kepaksa Keng Hoa djoeal-djoealin brapa roepa perabot roema. Sedeng begitoe, Kwe Sie doerhaka tiada maoe ambil poesing dengen itoe semoea kasoesaän; setiap hari bersama Tjo Mama la makan minoem, sama ini prempoean toea ia kaliatan djadi begitoe rapet, siang malem tiada maoe berpisaän.
Ada satoe malem, ini doea orang soeda djadi mabok keras dan dengen tiada perdoeli satoe apa lagi masing-masing pergi tidoer. Dapoer, di mana tadi ada digoenaken boeat bikin mateng barang makanan, apinja blon padem, samentara
di depannja ada banjak potongan kajoe ketjil-ketjil. Koetika ini doea orang masoek tidoer, dengen tiada didoega api soeda menjala dan bakar kajoe-kajoe jang ada di sitoe, kamoedian merembet pada ding-ding dapoer.
