— 669 —
Ko Siotjia lantas minta Tjheng Bwe terangken perkara apa jang membikin ia dapet rasa begitoe.
Ini Hamba lantas teroesken bitjaranja: „Siotjia tentoe masi inget, tatkala Soen-Thi-an-Houw kirim orang boeat samboet Khou Kongtjoe, itoe koetika Kongtjoe bilang apabila soeda lepas kaboengan, ia nanti dateng sendiri. Hal inilah jang membikin akoe koeatir ! Kerna akoe pikir, kaloe Siotjia sedeng bikin itoe perdjalanan, Kongtjoe dateng kamari, siapatah jang boleh disoeroe talangin Siotjia boeat djadi Kongtjoe ampoenja Hoedjin?”
Tempo oetjapken ini perkataan sampe pada achirnja, Tjheng Bwe tertawa berkikikan, membikin pipinja Ko Siotjia djadi mera sedikit. Ini nona tiada bilang apa-apa dan tjoema mengela napas, tapi roepanja ada menoendjoeken, begimana soesa adanja ia poenja hati.
Itoe antero malem Ko Siotjia tida bisa tidoer poeles, Sebab hatinja berdebar-debar. la sendiri tida mengarti mengapa baleh djadi begitoe, sedeng ia taoe betoel jang ia tiada pikir laen dari pada perkara ajah sendiri. Padahal ia tida inget, seperti orang seringkali bilang, kaloe satoe orang jang berada
