— 661 —
kombali dan taro itoe sendjata di atas medja.
Ko Siotjia lantas lepas badjoenja jang sebla loear, laloe iket pinggangnja jang langsing dengen satoe angkin soetra, dan sasoeda singsat dan selipin ia poenja koen hingga kaki tjelananja kaliatan, ia lantas berdjalan ka pelataran sambil membawa pedang.
Orang saisi roema djoega toeroet dateng di itoe tempat.
Tjoeatja ada terang seperti siang, oleh kerna boelan poernama mementjarken sinarnja jang gilang-goemilang; sedeng bebrapa bintang jang menaboer langit ampir tida kaliatan tjahajanja, lantaran samar dengen sinarnja itoe katja oedara.
Hok Tjoen merasa njesel sekali, jang itoe waktoe ia tida bisa korek kadoea bidji-mata sendiri dan tempel itoe di toeboe Siotjia.
Samentara itoe nona Loan soeda moelai pertoendjoeken kapandeannja. Bermoela dengen pelahan, tapi mingkin lama semingkin tjepet, dan achir-achir tjoema kaliatan sadja pedang jang berklebat pergi dateng dan naek toeroen seperti kilat, sedeng badan si nona ampirlah tida kaliatan.
Semoea penonton lantas bersoerak dan menepok tangan boeat poedji kaandeannja itoe nona bangsawan.
