— 229 —
Thia Kauw Kim dengen sigra lantas samperken.
Demikian mantri To Hong meliat Thia Kauw Kim mendatengin, maka disitoe lantas To Hong berkata : ja, oleh kerna saija tiada taoe jang Tjianswee ija hendak berhadlir disini, maka saija ada koerang tjepat boeat berpapak, harep minta Tjianswee ija djangan ambil pergoesar dan ketjil hati.
Thia Kauw Kim: — ja dari itoe harep lah Sinsiang djangan boeka swara begitoe, dan Sinsiang soeda datang berpapak pada saija itoe boedi saija trima dengen segala soeka hati.
Komedian kedoea orang itoe sehabisnja bitjara lantas satoe pada laen menoentoen kadoea tangannja troes di adjak masoek kadalem kraton, maka disitoe Thia Kauw Kim serta masoek lantas berloetoet di hadepan radja Po Kong Ong sambil berkata: — hamba berpangkat Lauw Kok Kong bernama Thia Kauw Kim, mengadep pada radja harep minta baginda radja soepaija mendjadi slamet pandjang oemoer.
Satelah radja Po Kong Ong meliat begitoe lantas ja samboet berkata: — ja Thia Ong Heng harep bole bangoen sadja dan bole doedoek di ini krosi.
Thia Kauw Kim: — oleh kerna hamba dateng disini dengen prentahnja sri baginda Maha-radja Lie Sie Bin hamba tiada brani doedoek.
