— 21 —
kloear boeat lawan? Disitoe ada Thia Kauw Kim berkata: ja Gwanswe, ini berprang kadoewa kali nanti saja sadja pegi aken melawan: dan Gwanswe blon kasi prenta dari pinggir kloewar Oetti Kiong dengen berkata: ja Gwanswe, itoe moesoe seboet saja poenja nama, dia kepengen saja mengadep lagi, baik saja pegi lawan. Srenta Gwanswe Tjin Siok Po dengar laloe bilang baik, kaloe maoe kloear berprang misti dengen hati-hati. Dan Oetti Kiong sahoetin: O! itoe tiada mengapa, lantas dia prenta seldadoe bawa dia poenja koeda troes naekin dengen bawa dia poenja pekakas. Dan Thia Kauw Kim liat begitoe lantas ja berkata: he moeka item! bermoela kau soeda reboet akoe poenja konglo dan ini kadoea kali patoetnja kau misti kasi akoe kloewar lawan itoe moesoe boeat trima konglo, apa sebab sekarang kau maoe reboet lagi, ja nanti di blakang kali akoe bole beritoeng sama kau.
Maka Oetti Kiong sahoetin dengen panggil: Lo Tjianswe, sebab itoe anak moeda dia seboet saja poenja nama boeat lawan berprang, tiada bole tiada saja misti mengadep bikin menang jang kedoea kali.
Thia Kauw Kim berkata lagi: ja moeka item, ini sekali djangan, kau kala lari, lebi baik akoe anter dari blakang brangkali bole mendjadi menang.
