— 215 —
kita poelang di goenoeng Ho Teng San lebi doeloe, nanti dari sitoe kita toelis soerat bertaloek.
Radja Po Kong Ong: — ja Sinsiang poenja perkataän betoel sekali.
Maka abis beromong-omong lantas soeroe keloearken makanan.
TJERITA GOANSWEE TJIN SIOK PO
Berame orang berpangkat dari famili radja (Titong Kok Kong) sekalian panglima prang (Tjiong Siauw Eng Jong) semoea masoek kedalem kota Bok Jang Shia, masing-masing pada berloetoet aken mengadep pada baginda radja Lie Sie Bin, maka disitoe ada Thia Kauw Kim jang lebih doeloe berloetoet di hadepan baginda radja sambil kerkata:— hamba dengen prentahnja baginda boeat pegi minta bala bantoean di kota Tiang An, maka hamba dateng ada sedikit lat harep baginda djangan ambil pergoesar.
Radja Lie Sie Bien:— ja Ong Heng angkau djangan kata begitoe, memang kami trima angkau poenja boedi jang angkau soeda pegi di Tiang An minta seldadoe bantoean, gandjaran ada besar sekali boeat angkau trima, harep angkau bole bangoen sadja. Maka Thia Kauw Kim bilang banjak trima kasi troes moendoer.
