— 147 —
Goanswee prentah hamba soeroe pangil Tjianswee boeat mengadep hendak di adjak berdami.
Maka Thia Kauw Kim denger begitoe dengen sigra lantas kloear sambil berkata : - He tjoetjoe, maoe ada kabar apa panggil pada kami?
Lo Tong : - Ja Thia Pehoe, baroesan saija dapet kepoelesan lantas mengimpi kedatengan saija poenja engkong berdoea bapa maka di dalem impian itoe poenja orang toea bilang soeroe membales dia poenja Wansioe jang soeda di bikin binasa, tapi dia ada pesen sama saija djikaloe saija hendak membales saija poenja orang toea poenja Wansioe bole tanja pada Thia Pehoe.
Satela Thia Kauw Kim mendenger sampe mendjadi kaget troes berkata : - O ho! kami poenja soedara bole kasi tjoetjoe impian begitoe, sekarang djikaloe tjoetjoe hendak Powansioe (hendak membales kadjahatan jang telah di bikin) bole toenggoe nanti sadja djikaloe soeda sampe di kota Bok Jang Shia.
Lo Tong : - Ja Pehoe, kerna saija poenja bapa poenja roh ada dateng pesen, djikaloe sekarang Pehoe tiada maoe bilang orangnja siapa jang keniaija saija poenja bapa nanti saija poenja bapa hendak bawa Pehoe di adjak poelang di Imhoe (rahmat toelah).
Maka kaget lah Thia Kauw Kim mendenger itoe soewara laloe mendjawab kata : - Ja bae
