— 83 —
Satelah sampe ka negrinja, ini Siensiang laloe mengadep pada Ma Say-jin, kasi taoe satoe persatoe tentang kakalahannja, dimana Twan Giauw telah binasa di tangan moesoe.
Mendenger itoe kabar, boekan maen kagetnja itoe radja. Maka dengen hati katakoetan ia memandang itoe Sinsiang dan berkata:
„Soenggoe tida doega sekali, jang itoe Hoenkangliong ada begitoe gaga, hingga bisa bikin moesna kita poenja pasoekan jang terdiri begitoe tegoe. Dan dengen binasanja Twan Giauw, membikin Siamlo djadi kailangan satoe tiang negri jang gaga perkasa. Sekarang, bagimana kita haroes berboeat?"
„Bagimana, kita haroes atoer sadja pendjagahan," kata itoe mantri dorna, jang soeda tida dapet laen pikiran, hanja kata sadja sakata-kata-nja: „lebi baek toeankoe prenta orang atoer persadiahan."
„Tapi pada panglima jang mana kita haroes pertjajaken ini pakerdjahan: tanja radja dengen pikiran bingoeng: „kerna dalem ini negri, soeda tida ada laen panglima jang boleh diandelin seperti Twan Giauw:
Kiong Tong tida bisa menjaoet.
Radja laloe tanja pada laen mantrinja, tapi djoega satoe pada laen-laen saling liat-liatin sadja.
