— 258 —
dahoeloe poen ada dibilang, bahoewa benoewa itoe boekan ada kapoenjahannja satoe orang sadja, siapa jang gaga, adil dan bidjaksana, dialah jang pantas mamerenta. Sedeng toeankoe ada mempoenjai itoe sifat-sifat, maka panteslah kaloe baginda doedoek bertachta sabagi Keizer. Boeat doedoek sabagi Keizer, njata baginda ada mempoenjai redjeki, kerna boektinja bisa diliat itoe penjebrangan di soengei Hoentangkang, jang maski sabetoelnja ada teramat soeker, toch kita poenja balatentara bisa liwati dengen tida mendapet halangan.“
Mendenger perkatahannja itoe kapala perang, Kim Tjoe djadi amat girang. Sedeng laen-laen mantri jang ditanja pikirannja poen, semoea menjataken moefakat. Maka itoe hari djoega Radja Kimkok laloe roba namanja taon djadi Hinkok pertama, sedeng nama negri diseboet Thaykim dan laloe bikin sembajangan besar boeat angkat dirinja mendjadi Keizer, aken bersoekoer pada Allah dan sakalian malaekat-malaekat, jang telah membri itoe koernia. Kamoedian membri persen pada soldadoe dan panglima perang.
Sasoeda oepatjara keangkatan itoe selesih dilakoeken, Radja Thaykimkok laloe madjoeken lebi djaoe pasoekannja, boeat reboet laen-laen kota dan kamoedian madjoe teroes aken serang negri Songtiauw.
