— 62 —
hatoerken trima kasi.
Koetika soeda poelang ka tempatnja tinggal, Liang-sih jang sekarang telah memangkoe djabatan besar, laloe pergi pada Tjoa Keng, boeat hatoerken trima kasi atas itoe Taysoe poenja toendjangan bitjara di dalem permoesjawaratan, hingga Baginda djadi toeroet sagala advies-adviesnja.
Dan waktoe hari jang telah ditetepken itoe sampe, Tio Liang-sih membri slamat tinggal pada Baginda, dan begitoe djoega pada Tjoa Keng dan laen-laen mantri dorna, dimana ia sendiri ada teritoeng sala satoe kaoemnja jang paling baroe.
Dalem perdjalanannja Tio Liang-sih itoe ka negri Kimkok, tida perloe kita ikoeti, kerna tida ada apa-apa jang penting boeat ditoetoerken.
Sekarang kita berlompat lebi pesat, jaitoe selang anem boelan sadari berangkatnja itoe oetoesan.
Pada boelan kadelapan, Liang-sih soeda balik kombali ka kota Radja bersama-sama oetoesannja radja Kimkok. Tapi sebab itoe hari waktoe ia sampe, Baginda soeda moendoer dari tempat bermoesjawarat, maka Tio Liang-sih laloe adjak oetoesan itoe mampir sadja di roemanja.
Esoknja pagi, sasoeda menoekar pakean, Liangsih laloe adjak oetoesan itoe pergi ka singgasana, dimana laloe kasi masoek soerat lapoer tentang baliknja bersama-sama satoe oetoesan, jang seka-
