— 56 —
senang kami nanti toeroet.“
Lie Tay-hong memanggoet dan kamoedian ia toetoerken, bagimana keadahannja Tiongkok pada negri Liauwkok, seperti orang jang bersoedara. Maski poen ini waktoe orang-orang Tayliauw maoe moelai bergerak tapi tida haroes kaloe Tiongkok jang besar moesti bersarikat pada Kim-kok.
Negri Kimkok betoel tegoe, kata poela itoe ambtenaar besar, tapi orang-orang itoe negri ada bangsa jang loewas dan tjoerang. Maka kaloe sekarang Tiongkok bikin persariketan padanja boeat membinasaken negri Tayliauw, ada tida bedah sabagi hendak matiken soedara, pergi mendeketi moesoe.
„Inilah jang hamba bilang sala,“ kata poela Lie Tay-hong sabagi penoetoepnja: „maka kaloe toeankoe teroesken djoega itoe perniatan, hamba koeatir nanti di blakang kali bisa datengken bahaja jang lebi besar, dari sabagimana bahaja jang dateng dari orang-orang Tayliauw. Sabenernja Lie Liang-sih boekan saorang pande, dan apa jang ia toetoerken itoe, menoeroet pemandangan dari lahir, sedeng batinnja jang bener ia tida taoe. Djoega ia tida mengarti bagimana selak-seloeknja dalem oeroesan politiek negri, tapi dengèn menoeroeti pikirannja jang tjoepet, ia soeda begitoe gegaba dan brani-branian mengasi pikiran
