— 50 —
Kamoedian sasoedanja bitjara-bitjara lagi sedikit, Lie Liang-sih laloe pamitan poelang.
Sasampenja di roema sendiri Lie Liang-sih itoe berkata:
„Tjoa Keng kaliatannja girang sekali jang akoe soeda membri hormat begitoe renda, maka itoe pertoeloengan jang ia djandjiken, akoe boleh harep. Sekarang akoe troesa koeatir jang perniatan boeat dapet pangkat besar, tida terkaboel.“
Itoe sore, lantaran tida ada kerdjahan apa-apa jang moesti dioeroes, maka siang-siang Lie Liang-sih soeda masoek kadalem kamar aken baringken diri, soepaja di hari esok pagi-pagi bisa bangoen.
Begitoelah satoe malem telah berlaloe.
Esoknja pagi, sasoedanja salin pakean. Liang-sih laloe pergi ka singgasana tempat di mana Baginda ada bermoesjawarat pada sakalian mantri-mantrinja. Ambtenaar civiel dan militair ada kaliatan berbaris di kiri kanan menoeroet tempatnja. Liang-sih jang satelah sampe, laloe madjoe berloetoet sambil menjeboet:
„Banswe! Banswe!“
„Pengsin,“ kata Baginda, jang memang soeda taoe siapa adanja ambtenaar itoe, kerna kamaren pada sabelonnja dateng mengadep, terlebi doeloe soeda dimasoeki satoe soerat boeat melapoer atas kadatengannja.
Lie Liang-sih laloe bangoen dan berdiri di
