— 205 —
„Apa kaoe tida harep dapet pertoeloengannja?”
„Dapet pertoeloengannja Kwe Keng, itoe pengemis? Pertoeloengan apatah jang ia bisa briken?”
„Pengemis? Bagaimana kaoe boleh bilang pengemis?”
Ngo-kho lantas tjeritaken satoe persatoe tentang dirinja, bahoewa ia sebenernja ada orang hoekoeman jang diprenta menganter perdjalananja Kwe Keng ka kota Kiankong. Kerna Kwe Keng itoe sabenerja ada satoe pengemis. tapi pada soeatoe hari Gisoe Tio Liang-sih jang ka betoelan brenti di pasanggrahan tempat singganja ambtenaar-ambtenaar, dapet ketemoe pada Kwe Keng, dan lantas ditoeloeng.
Satoe persatoe Ngo-kho toetoerken dengen terang, bagimana pada sabelonnja ketamoe itoe ambtenaar, Kwe Keng ada teramat pajah. Pakeannja jang mesoem ada amat boesoek, sitiap hari minta-minta barang sisa makanan dari itoe pengoeroes Koan.
Gak Ho dengerken itoe tjerita dengen merasa senang di hati. Sedeng Ngo-kho tjeritaken lebi djaoe, bagimana Kwe Keng itoe bener teramat sombong, hingga sagala perkara jang ia tida mampoe lakoeken, toch ia brani mati-matian aken sanggoepian. Hal jang terdjadi di roemanja Tjian Hoangwe poen dikasi taoe, dan sahabisnja menoetoerken itoe, masing-masing lantas tertawa.
