— 146 —
silaken goeroenja minoem. Dan baroe sadja gelas itoe kering, sigra djoega ditoewangken kombali.
Kwe Keng kaliatan girang betoel, Di itoe waktoe, laganja ini kaparat ada sabagi tjatjing jang kena aboe. Kerna menengok ka sana ada si konde litjin jang tersimpoel kembang, pandang ka mari ada si pinggang langsing jang lentik dan lemah lemboet. Adoe!, adoe!, hatinja Kwe Keng Liong soeda merasa dat-dit-doet seperti dikedoet, hingga laganja jang tengik dan menta poen soeda lantas kaloear.
la liat ka depan, ada banjak sekali anak-anak perawan jang tjantik dan eilok; satelah menoleh ka blakang, kombali terliat koempoelan njonja-njonja moeda dan gadis-gadis jang manis dan geulis, Wadoe!, wadoe, ini kali Kwe Keng Liong tida bisa tahan lagi ilernja jang mengatja, dara jang mengalir di oerat-oerat sendi djadi menggeremeng sabagi djalannja semoet gatel. Hatinja berdebar dan kadoea matanja jang sipit, ditoedjoeken betoel-betoel dengen tida berkesip.
„Toewang Allah, toewang ampoeng!....“ kata Kwe Keng itoe dalem hati: „soenggoe kota Kiankong ini sorga bener-bener; sedari akoe ketjil, ja malah sedari akoe ditêtêsin, akoe belon pernah liat mét begini banjak seperti di ini tempat,“
