— 8 —
doeloe ada djadi Djiko dari Liangsan, sakaloearnja dari kota Radja tida bisa peelang kombali ka-roemanja, kerna di tenga perdjalanan sasoeda ratjoen itoe oendjoek pengaroenja, Tjoen-gie djato ka-dalem aer dan binasa tida lama kamoedian.
Begitoe djoega dengen dirinja Song Kang dan Lie Koei, jang soeda djadi binasa lantaran kena makan arak tertjampoer ratjoen, jaitoe perboeatannja kawan dorna di kota Radja djoega. Oleh kerna binasanja ini doea soedara, hingga Gouw Jeng dan Hwa Eng djadi memboenoe diri lantaran terlaloe kesal.
Sedeng soedara-soedara angkat jang laen tida kadengeran lagi kabarnja, kerna tempat kadiamannja ada berpentjar. Tjoema terkabar, sasoeda Keizer Song Wie Tjong koerniaken pangkat, masing-masing itoe dititahken mendjalanken kawadjibannja di loear kota Radja. Tapi blakangan marika telah letaken djabatannja aken poelang ka-kampoeng sendiri, ada djoega jang mejakinken ilmoe kasaktian di pagoenoengan dan laen-laen tempat, kerna kaloe sateroesnja mamegang pangkat, boleh djadi ia-orang koeatir jang dirinja djoega nanti terbinasa di tangannja Tjoa Keng, atawa laen-laen dorna.
Ini semoea kadjadian jang doeloe-doeloe, Siauw-tjhit rasaken seperti baroe terdjadi di hari
