— 365 —
loe tida, boekan ini ada satoe djalan jang bikin ia bisa mendjabat pakerdjahan negri.
Salagi pembesar itoe berpikir, itoe oetoesan laloe menanja, Kwe Keng itoe sakit apatah dan soeda brapa lama ?
Sebab Liang-sih pikir, jang ini semoea ada salanja Kwe Keng sendiri, maka boeat apatah ia rasiaken? Begitoelah ia lantas kasi taoe, bahoewa Kwe Keng poenja sakit ada dari lantaran mengadoe ilmoe pada Oan Swie, dalem mana ia telah dikalaken dan sekarang lagi berbaring di kamar samping.
Kamoedian bersama itoe oetoesan, kadoea pembesar ini laloe pergi menengoki, dan satelah sampe, Liang-sih laloe oendjoeki, bahoewa orang jang lagi tidoer itoe ada Kwe Keng Todjin sendiri.
Itoe oetoesan tida brani riboet, kerna koeatir orang jang sakit itoe nanti djadi kaget. Dalem hatinja merasa amat sajang, mengapatah dalem waktoe jang perloe, mendadak ini orang berilmoe boleh dapet katjilakahan.
Tapi itoe waktoe Kwe Keng tida poeles, maka waktoe Lie Liang-sih adjak tetamoenja ka dalem kamar, Kwe Keng ada denger dan ia lantas menengok sambil berkata:
,,Siapatah jang dateng menengoki Pinto ?"
,,Boekan laen dari pada Tetjoe sendiri," saoet Liang-sih sambil menghamperi dan silaken oetoesan itoe berdoedoek. Kamoedian ia menanjaken bagimana sakitnja itoe bekas goeroe, apa ada baekan.
