— 351 —
toeroen ka poehoen tho dan petik itoe satangke boea jang mateng, dan taro atas nenampannja.
Sekarang penonton-penonton boekan heranin lagi kasaktiannja Hoensi Moöng, hanja kagoemi atas katjantikannja itoe bidadari, jang sasoeda petik boea terseboet laloe pergi ka panggoeng tempatnja Kwe Keng.
Itoe Todjin koeroes tatkala itoe lagi bengong terlongong-longong. Satelah meliat itoe peri menghamperi, ia djadi terkedjoet dan lantas bangoen. Sabelonnja bisa berkata apa-apa, peri itoe telah berkata dengen soeara njaring.
„Siantiang, trimalah ini boea tho sabagi hadia!“
„Hadia ?!. . . . . . . . . . Pinto mendapet hadia, ?!. . . . . . . . . .” menanja Kwe Keng dengen terkedjoet dan sedikit djenga: „tapi Sianli dari manatah ?“
„Apa Siantiang tida kenalin akoe ini ?“ berkata itoe peri sambil bersenjoem manis.
„Pinto belon pernah liat atawa katemoe pada Sianli,” saoet Kwe Keng: „manatah Pinto bisa kenal, kaloe tida dikasi taoe ?”
„Oh, ja, Sidji loepa, jang Siantiang belon taoe naek ka atas langit,” kata itoe peri dengen soeara merdoe: „kaloe maoe taoe, Sidji ini jalah di atas langit poenja sirikandi, pendjaga di astananja Ong Bouw Nio-nio, jang bernama Sie Hiang Giok-li.”
Oh!?. . . . . . . . . .”
„Kerna dapet taoe jang ini hari Siantiang mengadoe kasaktian,” kata poela Sie Hiang Giok-li
