— 347 —
Tapi penonton jang ada di bawah panggoeng, jang soeda denger Oan Swie poenja perkatahan, lantas berseroe:
„Soehoe poenja perkatahan ada bener sekali! Soehoe poenja perkatahan ada bener sekali! Begitoe memang baroe atoeran!”
„Ja, ja, itoe patoet! Itoe patoet!” treak poela jang laen.
„Kita-orang soeda menjaksikan Kwe Siansoe poenja kasaktian sampe tiga kali,” bertreak poela itoe penonton-penonton: „tapi belon liat Soehoe poenja ilmoe jang tinggi, maka tida lebi dari pantes, kaloe Soehoe djoega pertoendjoeken itoe!”
Kwe Keng masi tinggal berdiam.
Orang banjak bertreak poela:
„Apatah Kwe Siansoe merasa djeri dengen kesaktiannja Soehoe, maka Siansoe soeda lantas maoe berlaloe sadja sabelonnja dibales pertandingan?”
Kamoedian orang bertepok tangan.
Tatkala itoe di lapangan djadi oembrang dari berbagi-bagi perkatahan jang penonton oetjapken.
Itoe pembesar, jang bermoela ada pandang tinggi Kwe Keng poenja kasaktian, lantas dapet taoe sampe di mana itoe Todjin poenja kapandean. Kerna kaloe bener Kwe Keng masi ada mempoenjai ilmoe atawa hikmad jang moestadjeb, masalah ia maoe tinggalken sadja lawannja begitoe roepa, pada sasoedanja ia dibikin maloe?
Dengen maoe angkat kaki, ada djadi satoe ka-
