— 298 —
Tida lama laorang telah sampe di pondoknja Touw Hin.
Sasoedanja berdoedoek, kadoea sobat itoe beromong-omong lagi.
„Ia tida maoe kasi kaoe jang masoeki itoe djinasat, sebab ia koeatir itoe tanda-tanda loeka kaoe dapet liat, begitoe tentoe ada dipikir oleh itoe prampoean doerdjana,“ kata Jo Liem.
„Tapi toch akoe soeda dapet liat itoe,“ saoet Touw Hin.
„Begitoe si bener. Tapi tida taoe.“
„Sekarang tentoe ia lagi masoeki itoe djinasat.“
„Boleh djadi. Tapi boeat itoe kita-orang troesa pikiri lebi djaoe.“
„Bitjaramoe bener, sobat. — Akoe toeroet nasehatmoe jang baroesan.“
„Sagala apa kita moesti bekerdja dengen aloes. Soepaja kaoe poenja sakit hati bisa dibales. Perkara begini kita-orang tida boleh lakoeken dengen tjerobo, sebab sala-sala perboetannja, diri sendiri djadi soesa.“
„Ja, itoelah akoe djoega telah pikir.“
Apa jang dipikir dan didamiken oleh Touw Hin berdoea Jo Liem, itoelah sigra kita nanti dapet taoe. Dan sekarang baek kita balik kembali ka gedongnja Lie Kwa-eng, boeat liat itoe orang-orang doerhaka, jang sasoedanja oeroes djinasat pembesar terseboet, liwat brapa hari lajonnja Kwa-eng laloe dikoeboer.
