— 296 —
„Bagimana abis?“
„Benarlah sabagimana jang akoe doega.“
Jo Liem memandang dengen bengong.
Touw Hin laloe doedoek dan minta lagi satoe gelas arak. Doea orang gaga itoe laloe minoem sama-sama dengan pelahan sambil beromong.
„Bagimana doegahanmoe?“ tanja poela Jo Liem.
„Bener matinja Lie Kwa-eng jang baek itoe, lantaran terpitena.“
„Soenggoe?“
„Soenggoe mati!“
„Bagimana kaoe bisa taoe itoe?“
„Akoe sendiri telah liat tanda-tanda loeka di moekanja.“
Lebi djaoe Touw Hin tjeritaken apa jang ia soeda berlakoe di gedongnja itoe pembesar, bagimana waktoe ia masoek ka roewangan tempat djinasat, tida satoe orang ada di sitoe, kamoedian sahabisnja membri hormat jang pengabisan di hadepan lajonnja itoe pembesar, ia kaloear dan dapetken Giok-go ada bersama sama Pek-hoa lagi beromong-omong. Dan bagimana ia telah minta permisi boeat masoeki djisinnja Kwa-eng ka dalem peti lajon telah ditoelak oleh itoe prampoean doerdjana, dan bagimana ia telah dioesir oleh Pang Pek-hoa dan dioendjoeki pintoe boeat kaloear. Semoea ia tjeritaken terang.
Jo Liem dengerken itoe sambil menggoet-manggoet.
