— 269 —
djoedjoerannja hati: „tapi Touw Hin poenja kasalahan, tida terboekti terang, boekan?”
Giok-go lantas mara-mara dan kaloearken lagi bebrapa perkatahan jang koerang terang, kamoedian masoek ka dalem kamar.
Meliat begitoe, Lie Kwa-eng djadi berkoeatir.
Malemnja dari itoe hari, ia berpikir kombali, tjara bagimana ia haroes berlakoe.
Ia taoe jang Touw Hin itoe berhati baek. Dari kalakoean dan gerak-gerakannja ada ternjata, orang gaga itoe berhati djoedjoer, dan kaloe istrinja mengadoe begitoe, itoelah sakedar boeat mempitenah.
la tida maoe menghoekoem orang jang zonder dosa. Tapi boeat senangken hatinja itoe njonja eilok, terpaksa ia moesti toeroet djoega. Tapi hatinja tetep tida maoe djatoken hoekoeman berat.
„Lebi baek akoe pindahken sadja Touw Hin itoe ka lean tempat, jang djaoe dari matanja istrikoe,” kata si toea sendiri-sendiri. „sebab kaloe ia masi ada di sini dengen tida mendapet hoekoeman, tentoe akoe poenja istri boleh djadi goesar.Dan kaloe ia soeda mara, wah, tjadelah akoe ini. Tentoe ia tida maoe kasi lagi ako pauwhi.”
Begitoelah pada esokannja, waktoe doedoek di kantoor Kwa-eng laloe panggil Touw Hin dateng mengadep.
Touw Hin dateng menghamperi dan tanja, apa jang itoe pembesar maoe prenta padanja.
