— 246 —
jalah Pang Pek-hoa sadja. Di sagala saät dan waktoe roepanja itoe orang moeda sadja jang berbajang-bajang.
Hatinja Giok-go djadi amat doeka, kaloe inget: djangan-djangan ini Siauwtit djoega nanti berlakoe sabagi Touw Hin.
„Ah, kaloe sampe terdjadi begitoe,” kata ia dalem hati: „betoel-betoel leher goea boleh jadi kakeringan. ― áoeslah ...!”
„Tapi, ah, masalah Pek-hoa jang tjakep ada begitoe goblog seperti Touw Hin, itoe banteng,” pikir ia lebi djaoe: „akoe kira tida: ia ada saorang moeda jang tjakep, jang sedeng soeka sama plesiran doenia; maka boleh diharep jang maksoedkoe ini aken kasampean. Kendati tida tjepet, tapi toch lambat-laoen.”
Hatinja jang berdebar djadi memoekoel samingkin keras. Parasnja itoe orang moeda djadi berbajang-bajang samingkin njata.
Kasian Giok-go jang lagi bimbang, jang lagi berkoeatir tida kaoeroesan.
Tapi kaloe ia taoe jang itoe Siauwtit di kota Radja ada ternama Sektionggokoei, tentoe lebi siang ia soeda oendang sadja ka dalem kamar, masalah moesti poesingken otak boeat berpikir dan berdaja ini itoe.
Pendoedoek di Tongking membri itoe gelaran pada Pang Pek-hoa, ada dengen sapantesnja. Gelaran Sektionggokoei, jang berarti „Setan kalaparan”, itoe poen ada satimpal dengen peranginja.
