— 242 —
berbisik Jo Liem kasi taoe, bahoewa dialah adanja itoe orang jang lagi diserepin dan boeat dirampas barangnja.
„Oh, dia ?” kata Touw Hin: „tapi ia toeh boekannja soedagar ?”
„Bener. Tapi ia toeh ada mempoenjai banjak barang-barang.”
„Tapi ia ada Lie Kwa-eng poenja Siauwtit, harep kaoe tida toeroenin tangan.”
„Kwa-eng poenja Siauwtit ?"”
„Bener. Tadi Lie Kwa-eng sendiri telah bilang padakoe, bahoewa itoe tetamoe ada bernama Pang Pek-hoa jang baroe dateng dari kota Radja dan ada pernah Siauwtit padanja. ― Maka lagi sakali akoe harap, pandanglah kaoe poenja sobat jang soeda trima boedinja Lie Kwa-eng, djangan ganggoe kaslamatannja itoe Kongtjoe.”
„Baeklah, Moestail amat akoe tida toeroet Touw beng poenja kahendak.”
Touw Hin hatoerken trima kasi dan minta ini sobat menginep padanja di sini boeat satoe-doea malem. Tapi boeat ini Jo Liem bilang tida bisa, kerna kaloe ia moesti menginep, pasti membikin Pwe Soan jadi menoenggoe-noenggoe dengen koeatir.
„Kaloe begitoe, akoe poen tida brani menahan,” kata Touw Hin sambil kaloearken sapoeloe tail perak dan briken pada itoe sobat goena ongkos di djalan. Tapi Jo Liem soeda tampik dan kata, ada lebi baek kaloe ini oewang Touw Hin sadja
